tainancitybooks的部落格

較早定定聽阿公給阮講，古早的讀冊人只要三工無讀冊，就會予人感覺看起來面腔真討厭，會變成一個無人緣的人，所以從真小漢開始我就真愛看冊，除了學校所教的知識以外，我嘛真愛看真濟課外的冊，尤其是講著外國阿啄仔的事志合故事，其中有「魯賓遜漂流紀」、「小人國」、「金銀島」…等等，真是予我感覺真好奇擱真趣味，有當時嘛有一寡仔故事擱會使人感動流目屎，乎我更加拍拼、用功。
我上愛讀的一本書就是「最後一課」。「最後一課」，這本書是塊講一百外冬前佇歐洲德國合法國發生戰爭，有一個法國的小學生，平常時毋是真用功，上課攏會慢到，有一工，伊甲平常時同款擱遲到啊，心內當咧煩惱嚴格個老師欲給伊處罰，這個時陣，伊發覺教室的情形合平常時無仝，加幾啊個大人坐佇教室後壁，老師嘛穿甲特別整齊，並無慾給處罰的意思，規間教室攏無人出聲，就若親像一支針落落土跤也會有聲同款。老師佇伊坐好了後給大家宣佈，「今仔日是最後的一課啊，因為咱的國家相戰拍輸，規個省攏愛割予別人，這個所在明仔載就欲予德國人佔領去啊！明仔載開始就袂使教家己的語言囉」，老師把握著最後半工的時間共大家複習法語，並且共全班的學生講「只要保存著咱家己的語言，就會使保留咱的文化，有一工一定會使共咱失去的所在討轉來！」。
我捌聽序大人講過，台灣卡早嘛有強欲同款的情形，台灣以早因為相戰拍輸受著日本人的統治五十年，日本為著欲消滅台灣文化，欲予台灣人變做日本人，嘛無愛予台灣人學台語、講台語，有人因為講台語予人處罰，但是有真濟人不怕死，偷偷啊佇「漢學仔」內底學漢文，也有真濟人用台語作詩吟唱，無論日本人安怎欺負咱，台語嘛是流傳落來啊！
這本冊所講的故事予我真感動，本來我就對台語有真大個興趣，後來擱看過這本冊了後，毋若這個興趣無減少，更加知影家己語言個重要性，俗語說「吃果子拜樹頭；喝泉水思源頭」，台語是咱的母語，是阿母的話，咱袂使袂記咱的根本，「三日無溜爬上樹」，佇日常生活的時陣就愛定定練台語、講台語，才袂予台語拍無去，才會使將台灣上好的文化一千年、一萬年保存落來。