八卦出頭天
楊 焜 顯
暗摸摸 日頭
嘛光起來
爛糊糊 金紙
嘛飛起來
澹漉漉 銀紙
嘛著（toh8）起來
冷冰冰 骨頭
嘛活起來
一陣人
有一款命格，氣魄
有一種悲哀
有喙有心
閣有一身膽
有另外一種悲哀
有另外一款氣魄，命格
另外一陣人
聽無的 講有的
講有的 聽無的
好事真歹講
歹事講好聽
好所在、歹所在
年頭過年尾
大尾的出頭
計算有的、無的
無的有形，有的無影
無的有名，有的無聲
好人激歹勢
歹人予伊好勢
好年冬、歹年冬
年尾接年頭
大頭的收尾
講彼有的、無的
斷尾的蟮蟲仔爬上壁
搖尾的飯匙銃搶頭香
粒粒頭的蚼蟻規厝間
大鼻頭的狗仔踅街頭
八卦消息無喙會吼
獨家新聞無跤會走
土地仝一片土地
世界無仝个世界
日頭
赤焱焱焱焱焱
有影
抑無影
隨人
顧性命命命命
會驚
抑袂驚
2007.7.28.定稿
埔里雜記 蔡承翰作品
迄年歇熱 阮欲去找過去
走找身影佮腳跡(kha-jiah)
遮有茄冬樹 遮有打鐵街
閣有爬到軟腳的地理中心碑
阮無看見神社
只看到遠遠有迄層通天的中台禪寺
愛蘭橋頂 彼當時 聽講有人佇遐戰戰死
阮走來埔里 無想到時間早先一步跳轉去
大大紀念碑 細細規行字 目睭金金仔相
原來遐有四个字
什麼是「圓 ㄩㄢˊ 而 ㄦˊ 不 ㄅㄨˋ 圓 ㄩㄢˊ 」？
就是 大大个石頭輪
崎崎嶇嶇的大馬路邊 共同的歷史失憶
阮想到另外迄句成語 意思應該相差無幾
什麼是「焚 ㄈㄣˊ 而 ㄦˊ 不 ㄅㄨˋ 燬 ㄏㄨㄟˇ 」？
就是一桶汽油 煉獄內閣猶原放光明
幾冬啊？
彼年埔里風真冷 阮毋識想起過去
若講起過去 濟濟的代誌煞無聲無息
勿堪得我擱閃避
今年个埔里 有我先前未乾的腳跡
頭眩目暗
踏入酒廠聞著酒味 無食酒也醉
心內惦記伊 恬恬仔想當時
干礁佇路邊 欲輸著看見伊
閣有微微頭毛个香味
提筆寫情詩 寫無規字 我真想伊……
2007/8/6寫於埔里演習林外
留言列表
