〈生命的故事之二〉
黃昏 e 時陣
阿媽搬著一 liau 古椅
將伊 e 傢俬拿出來亭仔跤
Ka一 e 椅頭囥 kah 滿滿
有大支柴梳、細支齒梳、茶油、夾仔 kah 網仔
講著網仔
阮幾個猴囝仔 頂遍
趁阿媽沒注意偷偷提去水溝仔 ho（撈）魚仔
Ho 啊 ho
囝仔人愈用愈好玩
Khiu（扯）來 khiu 去 煞破去
幾個人面煞驚 kah 青筍筍
彼瞑逐家皮就磞較緊
逢摃 m 敢哭出聲
嘴咧唸 這是阿姑仔拜託人按日本提轉來
死囝仔 m 知輕重
安呢阿媽就無媠啦
金色彩光閃置黑色的頭毛邊
手提柴梳抹淡薄茶油
直直梳落來一直到腰遐呢仔長
她頭毛直 koh 濟也黑 sim- sim
大家鬥鬧熱
一個提梳子
一個提網仔
欲 ka 頭毛包一個包仔
頭毛梳對後壁 面煞光 hian 重巡深目珠也大蕊
阿媽!您 e 頭毛水 koh 黑又 koh無 頭蝨
M 免親像我囝仔愛用幼梳來梳蝨母
遐呢芳貢貢
阮這班 e 阿媽 您上媠 koh 好看
乎阮真歡喜
----寫置府城舊冊店2007.9.16
補 * 分享 *
【台語詩】阿媽e菜脯 刊載於台灣教會公報2891期
〈生命的故事之一〉
手咧甕仔底撏啊撏，
彼 kha 甕仔大約尺半高，
看著黑黑臭臭，
葫蘆形 e 腹肚嘴口小小，
撏出黑黑 e 足小條物件。
憨孫 e！
阿媽 ka 你講，
這是真久以前就豉好，
一直 m 甘吃，
阿媽用手扐互一絲一絲，
提一塊塞咧我 e 嘴，
就講：食看 mai，
這是陳年 e 老菜脯，
雖然看起來黑黑沒真水 ，
也真鹹，
配糜上好，
會凍配足濟碗，
咱兜歹賺食，
囝仔又擱濟，
儉儉啊用，
序大人真艱苦，
逐工走闖，
最近空襲厝內攏無米，
雞仔逢吵 kah be 生卵，
毋知欲用啥來止 iau，
人講沒米煮番薯湯，
咱兜也沒半分地，
水牛擱卡毋免講……
soah 那講那小聲，
目眶隨紅。
彼時細漢 m 知阿媽 teh 講啥物，
只有看著面前阿媽常常用茶油梳 e 頭毛，
後面一個包仔，
雖然七十外，
猶是黑 sim- sim，
又閣身軀芳貢貢，
互我愛攬直遐，
也沒煩惱，
只會曉用目睭金金看，
也 m 知聽有沒？
當時我五歲，
今嗎想起來，
目屎輾輾遨。
留言列表
